gee

gee vir my 'n oomblik van jou vlees
net 'n sug in die nag
sodat ek die lyne van jou lyf kan lees
gee vir my jou dag
laat my jou son 'n rukkie leen
sodat ek my pad terug kan kry
want ek en die donker is een
gee vir my al die hoekies van jou siel
laat ek in jou seer verdwaal
sodat al jou skerp kante my hart verniel
want van alles wat ek ooit sal kan kry
is daar net een wat regtig saakmaak
die een is altyd jy

 

huis

daar is 'n plek waar my hart stil kan wees

'n plek waar jy die grond kan ruik as dit reën

en snags jou stories in die sterre lees

daar is 'n plek waar jy nog uit jou maag uit kan lag

waar mense nog bid en glo en hoop

en lewe van dag tot dag

daar is 'n plek waar my siel bedaar

en as jy wil, dan kry ek jou daar

vergeet

ek onthou nog die plek en die reuk van jou sweet

maar in my onthou het ek jou naam vergeet

ek onthou die wind en die smaak in my mond

die honger in jou oë soos 'n wegloop hond

ek onthou die niks wat jy was en die niks wat jy is

 wat gestalte vind in die niks wat ek voel en die niks wat ek mis

en soos elke stukkie van jou onthou al minder verskyn

sal die gevoel van jou hande op my nek

jou oë, die smaak in my mond en die plek

ook eendag in die niet in verdwyn



omdraai

daar was liefde in 'n vreemde land

gelato, pizza en skelm vry

en vir jou sou ek my siel verpand

as dit kon beteken dat jy sou bly 

onskuld

die onskuld het my lankal reeds verloor

êrens tussen rooiwyn, waansin en die nag

dit lê langs die skerwe van my drome

toegevou in die weerloosheid van my lag

maar as die son jou skaduwee so oor my gooi

en jou lyf my van alle redelikheid beroof

begin ek weer aan die onskuldige liefde glo

wat my hart steeds roekeloos aan my lyf beloof

verdwaal

ek weet jy is nog hier iewers

jou spore nog plek-plek in die sand

jou reuk speel in die wind

jou herhinderinge toegevou in my hand

jou stem eggo deur die bome

jou glimag loop uit in my skryf

ek weet jy's nog hier iewers

in die laning van my lyf

die groot vraag

as jy my binnekant kon ken;

sou jy 'n rukkie kon sit in my donker?

as ek jou al my geheime vertel

sou jy nog oor my misterie kon wonder?

as jy al my gedagtes kon hoor

sou jy nog wou hê ek moes bly?

as jy geweet het van al die seer

sou jy nog lief kon wees vir my?

afdraaipad

aan die einde wanneer al my paaie klaar geloop is

en prentjies al wat oor is van onthou

sal my hart steeds na jou oë verlang; 

sal ek kaalvoet my laaste afdraaipad loop tot by jou